من كل شي شوية ... لما كنت انخبرش زمان ... وتوة ... خرابيش

الأحد، 23 أكتوبر 2016

الحالة ...

By 11:40 ص
السلام عليكم ورحمة الله و بركاته 





أكثر من مرة تمر بنا هذه الحالة ، و أكثر من مرة نحاولوا أن نفوتوها و إن كنا نضعفولها و نتعبو من الي صاير و نرجعو ...

و نقولو غير شن قاعدين نديرو نحن ... 
وحتى الوجوه مرات تصبح مزعجة و تعابيرها مخيفة و حتى طريقة اللبس و البيئة نفسها تصبح مزعجة أحيانا كان تلقى ما تشوف لحد وما تشوف حد أصلا... 
ولما تحكي تحس إنك تتكلم في لغة مختلفة مش نفس الي يحكي بها الكل ... و غير متحشمين منك ما يقدر حد يقول إرفس ولا عدي العب بعيد... وكان سايرك ودار روحه مركز، معناهة فيه الخير ... 

إلا الي يعرفك و فاهم و مقدر و يعرف شن معنى الكلام الي تقول فيه و هذا ممكن يكون في منه شوية و ممكن ما يكون فيه منه بكل، و كل واحد و نصيبه فيها الحاجة هذه... لكن تلاحظ مرات هو نفسه لما يكون في مجمع من ناس أو أصحاب يسايرهم هم وما يسارك أنت، و لما يكون معك بروحكم من غير ما يكون في حد معاكم... وقتها يقولك فاهمك و يبان عليه أنه فاهمك و عارف كويس شن تقول ... 

لكن في الجماعة وفي الزحمة... لأن في شي غريب و مختلف جدا عن البقية... يخليه يمشي مع الزحمة أكثر من أن يمشي مع قناعاته و الي أنت تقول فيه ... و هذا مرات يزيد يخليك تقول أيه دا و مالو دا ماكانش كدا دا ... 

لكن ترجع ترجع و تشوف لنفسك انك تحاول ، ديما تحاول انك تقرب للصح و إن كنت مليان خطأ و مليان عيوب ولكن لما تشوف العقليات الأخرى و تكتشف وجود أشياء كثيرة سطحية جدا ... و انهم في أغلب الأوقات  ينسو في كل شي و يمشو ورا الي ماشيين وراه الناس كلهم و من غير ما تحكم في عقلها .... ولذلك مع كل هذه الحالات... 
توقف بينك و بين نفسك و ترجع و تشوف وتقول على الأقل... على الأقل...  أنا نحاول أنا ماشي في طريقي مش إمعة ولا تُبّع


شكراً...