السلام عليكم ورحمة الله و بركاته
- سمعت قالوا عبدو تزوج ولا؟
- و الله جديات؟
- إيه ربي يهنيه إن شاء الله
- تي بالله ما لقا ما يدير، توة هو وقت زواج أصلا؟ فكني يا راجل
- و ليش لا شن فيه الزواج ، الحمد لله الراجل ستر روحه و ستر بنت الناس وربي يتمم له بخير
- تي انت شورك مش سامع شن صاير مع الي تزوجو، تي عدي شوف الصفحات معبية مشاكل و هم ياكلو في بعضهم تقول زومبي و حرب عالمية وشغل مخابرات ما تقول عليهم سي أي ايه و الحرب الباردة، بالله فكني لا زواج لا شي ، كرهونا فيه الزواج و سيرة الزواج
- قصدك أنت كاره الزواج في جرة الأخبار الي تسمع فيها؟
- يا راجل ما سمعتش قصة زواج مشت باهي ، الي يتزوج وكان شبيب نظيف و ما شاء الله عليه ، فجأة تلقاه متنكد و متفركس ، تقوله خير شن فيه شن صار؟ يقولك المرا وأمها و العيال و المصاريف و الحفاضات و الحليب و شن درت في روحي بس.
- تعرف خطرت علي واحد كان معانا في الشركة جاي من إيطاليا اسمه ألبرتو
- شن علاقته البرتو هذا حتى إسلام ماهو مسلم شكله ياكل في الحلوف
- ايه ماهو هنا القصة
- قصة شن؟
- هذا يا سيدي البرتو يكره حاجة إسمها اسلام بسم سمه ، من جد جده
- ماهو مش منه حتى هو ، الجماعة طايحين فيها تكيبر و تفجير و قتل و قطع روس والي زي البرتو يلقوه سلامته
- ايه باهي أنت مقتنع توة ان هذو يمثلو الإسلام؟ ولا ينفع الواحد ياخذهم قدوة للاسلام؟
- الحق لا، لأنهم ما لهم علاقة بالإسلام بكل لا من بعيد لا قريب غير مركبين فينا الشبهة يسمو في أرواحهم أسامي إسلامية و يحكو بإسم الإسلام و خلاص
- باهي أنت توة كيف تقنعه البرتو هذا أن هذو ما يمثلوش الإسلام؟
- هات جيبه نهدرز معاه ساعتين بس نقنعه و خليه حتى يسلم على يدي إن شاء الله
- شن بتقوله؟
- بنقول له الإسلام شيء و الناس الي تقول أنها اتبع في الإسلام شي آخر ماله علاقة ببعضه، ما تاخذش الدين من الي يتعاملو به غلط في غلط، و تكره الدين، لكن خوذ الدين من أصوله ولو أنت طبقت أصوله صح، وقتها حتشوف وتعرف أن الدين حاجة تغير لك حياتك و تخليك تشوف للدنيا بمنظور مختلف تمام… و حتريح قلبك و تخليك عايش في سعادة لابيك لا عليك، بس أهم شي أفهمه صح و طبقه صح بعد ما تعرف أصوله و تعرف تفاصيله الي تهمك، و البقية كلها عليك أنت، أما المختشين متاع القتل و الذبح و العياط و التفجير بإسم الإسلام هذو ما يمثلو الإسلام هذو يمثلو أنفسهم بس مش أكثر، حتى لو تكلمو بإسمه لكن هم مالهم به علاقة بكل…
- يا وخي ما شاء الله عليك ، كيف جبتها من الأخير
- تي كيف نعجب راه
- باهي شن رأيك تتزوج؟
- تي نتزوج شني يا راجل قول كلام ثاني، فكنا من السو، امالا تبيني نختش حتى أنا زي الي ختشو؟
- لا ماهو أنت لما بتتزوج بتفهم الزواج صح و تعرف أصوله و تعرف كيف اطبقه و ما تاخذش قدوتك من الي خشو على الزواج بالمعوج و تقول كرهت الزواج، هذو الي تزوجو شي و الزواج الحقيقي الأصلي شي قاني ما له علاقة ببعضه بكل، ما تاخذش مفهوم الزواج من الي تيعاملو به غلط في غلط، و تكره الزواج، لكن خوذ الزواج على أصوله ولو أنت طبقت أصوله صح و فهمتها صح، وقتها حتشوف وتعرف أن الزواج حاجة تغير لك حياتك و تخليك للدنيا بمنظور مختلف تماما… و حتريح نفسك وقلبك و تخليك عايش في سعادة لا بيك لا عليك، بس أهم شي أفهمه صح، و طبقه صح بعد ما تعرف أصوله وتعرف تفاصيله الي تهمك، و البقية كلها عليك أنت، أما المختشين متع المشاكل و الهرايج و العراكات و المؤامرات و الحرب الباردة و قالتلي و قلتلها و جيبلها و جابتله و ما دراتله… وكله على أساس متزوجين هذو ما يمثلو الزواج هذو يمثلو أنفسهم بس مش أكثر، حتى لو تكلمو بإسم الزواج لكن هم مالهم به علاقة بكل وهم يمثلو أنفسهم بس.
شكراً…
